Eretriyah agatitteh ximokraasih foocak taama selta makaadok madabiino daffeynah mamarraqa

Culma: Eretriyah agatitteh ximokraasih foocak taama selta makaadok inik heele madabiino daffeyna sebtember alsak 3-5/2010 gexiseenih yaniinim kee lafa leh tan rasi giddaanimit walaleenih yaniinim timixxige.

Siidica ayro fanah akkuk sugteh tan daffeynal fooca fanah aboonu waanah yanin foci taamoomi kee faxximtah tan rasi giddaanimih ekraaro elle fiiriseenih yaniinim tama foocak taama selta makaado diggosse.

 

Rasi giddaanimi: ni-baaxo Eretriyal geytimteh tan rasi amo baxxaaqa shaqbiyyah xinto umaaneek gexxaamah ummatta luk sugteh tan esseroora axcih ximokraasih esserooy, sahdayti baxah faximtah tanim kee kalah raqtah tan Esseroora tandabbem inkinnah maduuduminna: axcih Eretriyah ummatta faxxah tanim illacabook yakkeh yan milaagukkah widdirlih yakkeh yan umbulluyyu qellitti iyyah yan milaagu faxe waytah tanim taama selta makaado qaddosse.
Eretriyah ummatta qululuuy, baacaay, widirraaqak tassaaqaauuy inkittiino akak diggowtah tan Eritriya xissimtuh faxximtah tanim shaqbiyyah xinto ummattah amok kalaanam kee Eretriyah ummatta tayseemit qagitak boositaanam kinnih tanim taama selta makaado diggosse.
Tamah diggowtuh kaaduuy eretriyah ummatta dumaak muxxih inkittiino isinnik diggoysaanam kee milaagul sigga luk yaamineenim faxximtah tanim taama selta makaado nummasse.

Agatiina foocih giddaanimi kee agattiina weelol xissiimaanama: Eretriyah agatitte miraacisah yan agatitteh ximokraasih focih xisne kobox gexiseemiiy akke fanah mangoh tan daffeynaani gexisak isik faxximtah taniimit uguteh yanim tamixxige.  June alsaay 2010 tama focal liggidi edde yendebbeh yaniimik qimmissi haak baxsa leh yan  Agatitte koboxuh faxximtah tan taamoomi abinal asisak kobok yekkeh anuk yenem kassinna.
Tama koboxul Eretriyal tanim baxsa luk agatitte xukko kinnih tanim elle diggowteh anuk tenem yangirgireh yan qangootut elle daabimteh tenem kee faxxiimah yan koboxuy mayso orbiseh yene yekkeh yanim qaddowte.  Tama koboxut marrowteh tan agatitte massoynaani kee agatittek baxsa leh tan maasoynaani ken fanat sugeh yan hittal xayyoowe waanam cabak meqeh yan gicloh afkan elle hadaleenih anuk yenen.

Tohlih kaaduuy agatitte massoynaanih fanal mabla kee hadaf hittin gey hadlimak inkittiinoh akat hittallih abbaxuk yangiicilleenimih hittin gey abak Eretriyah kobox ximoraasih milaagu iyyah yan koboxul inki arraabat yaabak akah culan innah inkittiino elle hadlimteh anuk ten koboxuk anuk ten.
Raqteh tan agatiite massoynaani ubka kobox akah gexisan innah wakliini hinttin qokol keenih akah aban innah xaga elle culeenih anuk yenen koboxuk ten.
Tigreeniyah agat kaaduuy gaaboowak raqteh tan Eretriya agattiinaanih massoynaanillih angaluk angiiclille weenik inkittiino sigga akak leh tan Eretriyay maqar leh tani xissimtam duudume waytah taniim taama selta makaado inki xongolot qaddosse.

Tohi taagah agatitte massoynaani gexissah tan taamoomi agaaradak agat weelo xissiimaanam inki inki massoynaaniy Eretriyah giddaani akah qaddoowe wayta akah intak gibbattanna hinnay inkittiinoh essero fanteena akak kinnih tan essero kinnuuk inkih tan Eretriyah xaylo wagittah tan essero kinnih tanim taama selta makaado diggosse.

Agat weelol xissiimaanam agiddaytuuy agidaytu dubuh wagittaah raqteh tan agatitte wagittam akke waytah tanim edde celtah tan xagaritte tanih tanim qagab akke waytah tanim qaddoysak agat weelol xissiimaanam widdirlih gexxaamay mangoh tan qaadaay, Afaay, Diini leh tan ummatta elle tanih tan rasul faxximtaay kattaateh meqe kinnih tanim kee agatitte massoynaani agat xisneek raqteh tan xisneena xissimtam mafaxximta intah tan ceena le mabla alle waytah tanim kee tonnah tan ceena le mabla eretriyah qaran gubal 50 liggidaak amo yakkeh yan widdirih tanay immay cakkil xissiimaanamak ummattah waassah tan mabala akke waytah tanim taama selta makaado diggosse.

fidin kobox kee geytimeh yan tuxxiiqi: agatitte focih adoytit Eretiyah kobox ximokraasih milaagul digreenih anuk yenen  doori qimmook qimmisak illacabo fanah dagoom akke waak yenem kee boodah yan gibdaabinitte qellaaminal fakak kobox illacabo maasayya gufuh yusbulluyeenih anuk yenen abinitte kaxxam sinam ruffu edde inteh anuk tenem kee mangoh tan caagiidal raqteh tan massoynaanillih bicak kobox maysot orobuh gibdih yan doori digreenih anuk yeneenim tamixxige.
Agatitte foci xissiimay dagoo karma yallay immay eretriyah koboxul digreh anuk doori kaxxam muquk anuk yenem kee tohuk amo gexa sumaq agtitteh esseroy mango widdirih oggol waak sugte awlaytiino akah geytannah abaanam kee koboxul edde walalan ximmoh fanah bahteh tanim tama fooca kinnuk lafa le ximmo kinnih tanim taama selta makaado nummasse.
Tanih tan  nummak axxeeruk numma xarraboysoonuh inki inki massoynaani fidin kobok Eretriyah ximokraasih milaagih koboxok tewqeh tan madqooqi xarraboysaanak gibbataanamih abinitte taama selta makaado tassacakkeh tanim kee agattiina foci tama madqa ummatta elle agaaradak amo akak tabteh tan madqa kinnuk ummatta dagah alliyyal yaamineenim kee ummatta madaqteh tan agatitteh essero ilaa baxsa fan intah tan maasayya ummattah ikoyta kinnuk tama maasayya xarrabossak gibbattah tan massoynaani edde uguteenih yanin isinni ceena le mablak isinni gacsaanam faxximtam taama selta makaado diggosse. Tama mabla abinal asissaah, ummattah essrol taamineh tan xagortillih boor kee bagu tikki inteh taamitu waytah tanim agatitte foocak taama selta makaado diggosse.

Rasi kobox koo-baahisaanama: Agatitte foci Eretriyah ximokraasih eglak xagarak teena kinnuk ximokraasih koboxih komishinih mamaxxaga acayukuuy faxximtaamal aminuk tama foocak faxximtah tan abinittek ugutoonu waanah yaniinim taama selta makaado qaddossa.
tama komoshinih ekraaro inkittiino kinnuk kobox migaaqal takkeh tan anfaqe sinnih tan angagoyyittel taama selta makaado amine waytaamih taagah inkih tan sadi massoynaani firti hangi koboxul hoonuh seeco tatrussa. Agatitte massoynaani sidiica alsih taamah ekraaro ayyaaquk faxximtah tan siyaasa madqooqi ayyaaquk fanti makaadoh daffeynah ayro madaqak daffeynak maysol yumurruqe.

Agatiina weelol xissiimaanam ni-cakkik caabiiy nek-mano rakiibo
Agatitte fooxa 06/09/2010